阿仙奴領隊雲格喺買賣球員方面向來眼光獨到，經常低買高賣，或者高買更高賣，稱得上係球壇狙擊手。但佢都有走漏眼入錯貨，其中艾沙維更係佢嘅代表劣作；事關呢位俄羅斯前鋒，喺2013年每上陣1分鐘嘅人工要成兵工廠3萬鎊（約357,000港元），名副其實係阿聯酋球場嘅蛀米大蟲。
現年31歲嘅艾沙維仲有兩個月就約滿阿仙奴，領隊雲格唔同佢續約之餘，仲恨不得佢快啲離隊。點解？因為艾沙維蛀緊兵工廠個米缸囉。艾沙維喺09年1月以1,500萬鎊由辛尼特來投，開頭都算ok，仲喺季尾作客打和利物浦4:4場波入4粒，間接搞到紅軍贏唔到英超；但之後越踢越差，結果喺去季嘅下半季就俾雲格借咗返辛尼特。今季佢返嚟阿聯酋球場後，長坐冷板櫈；喺英超踢得嗰7場，仲場場後備，而且1球都入唔到；加埋其他賽事，總共踢咗11場，落場時間係341分鐘；據報佢嘅周薪成有95,000鎊，咁即係每分鐘嘅人工係7,800鎊。
人工貴過美斯、C朗
踏入2013年後，佢只係喺1月20日號作客輸畀車路士1:2場英超，後備踢咗15分鐘；成個月先打得嗰15分鐘，換言之每分鐘有成3萬鎊，好波過佢10倍嘅美斯同基斯坦奴朗拿度，都冇呢個價啦！除咗艾沙維，兵工廠陣中都有唔少蛀米大蟲，喺今季先後被借走嘅安德里山度士同埋佐羅，之前喺度都係嘥米飯，不過據講佢兩個都話希望走咗唔使返嚟，對阿仙奴嚟講真係好消息。
其實艾沙維都唔愁出路，事關有多間中超同美職聯球會向佢招手；講真，雖然佢喺英超失敗收場，但話晒唔算老，而且波底好，如果去啲水平較低嘅聯賽，仲可以踢多幾年。不過，聽聞艾沙維話因為喺阿仙奴太唔愉快，所以唔想繼續踢波，仲計劃約滿後就掛靴。計我求大俠話，佢喺阿仙奴效力4年半，執咗成2,200萬鎊，返到家鄉俄羅斯係億萬富豪，仲使鬼踢波咩，繼續享受一下人生好過啦。