低息環境下，香港同新加坡樓價升到飛起，搞到兩地政府頻出招調控樓市。聯交所前主席鄭維健嘅三弟鄭維強亦趁樓價高企高價賣樓，將新加坡一間大屋，連泳池、網球場標售，叫價19億元（約3億坡紙），若然賣得出將刷當地成交紀錄。
永泰集團鄭氏一門五傑，大哥鄭維健在港政經界紅極一時，近年轉趨低調；排第四嘅鄭維新現任教資會主席，亦為人所熟識。62歲嘅鄭維強排第三，主要喺新加坡發展，係當地地產及零售商永泰話事人，又被稱為新加坡公職王。
連鄭維強都忍唔住高價放售物業，係咪預示當地樓價見頂呢？佢間大屋接近烏節路購物區，位於那森路，佔地8.5萬平方呎，如果賣得出就創紀錄，不過有當地經紀潑冷水，認為佢叫價太高，未必有人接貨，呢單刁5月16號截標，即管睇吓結果係點。