城市大學傳來電郵，係一張畫展宣傳海報，中文標題十分吸引、醒目，就係「半鑊生、半鑊熟」，邀請左丁山出席四月十三日星期六下午六時正在城大邵逸夫創意媒體中心三樓CMC Gallery舉行嘅開幕酒會。畫展就在當日展出，直至4月23日。乜嘢叫做「半鑊生、半鑊熟」？英文係Melting Pot ，都不知是中譯英還是英譯中，大概係參展藝術家諗出嚟嘅。
酒會舉行之前，由下午三點半到五點半，有一場研討會舉行，主題係探討繪畫爭議性話題，左丁山並非陶傑，唔識繪畫，百分百係門外漢，睇城大資料介紹，呢次展覽以融合謬誤為切入點，探討繪畫與溝通情境之微妙關係，涉及藝術家對創作爭論，磨合和試驗，世界上沒有真正「純粹」（Pure），一切都係有條件嘅，展覽主題 Melting Pot ，起初原意為一班彼此認識許多年之老中青畫家共冶一爐，互探畫風，但傾吓傾吓，發覺大家在討論過程中，出現不斷嘅差異、添補，根本冇融合呢回事，最後大家達致一種意念上半生、半熟的互不相類，互不為主題的自然、異質場域狀態，於是索性叫呢場畫展為「半鑊生、半鑊熟」。
參展嘅畫家有陳偉邦、林東鵬、楊秀卓、陳漢標、陳育強、香建峰、周俊輝、楊東龍、余偉聯及鍾大富一共十位，其中左丁山認識嘅有陳偉邦、陳育強、鍾大富三位，與陳偉邦最熟，知佢近年專注教書，甚少畫作，呢次受参展刺激，近月閉關不出，教書之餘就躲在火炭畫室繪畫，可能會有驚喜俾大家都唔定，佢月前應邀為畢加索畫展及安地華荷作品展作公開演講，介紹如何欣賞呢兩位大師之不同藝術風格，甚受歡迎。
左丁山就市儈啲，問過陳偉邦，佢啲畫賣唔賣得，佢只會苦笑。後來在陸羽與醫生Ｃ講起，醫生Ｃ開玩笑話：「首先將姓Chan改為內地拼音Chen先啦！」左丁山唔明，醫生Ｃ呢位古董收藏家話：「藝術炒家狂捧內地畫家，香港廣東畫家不在佢地雷達探測範圍內！」最近集古齋有清代古董拍賣，並非名作，一啲道光年間嘅瓷碗，討價六至八千元，醫生Ｃ叫老友代理出價十萬，點知俾內地客以一百二十萬買走，醫生Ｃ嘆氣咁話：「要內地人識得先至賣得高價！」