做咗旅發局主席冇耐嘅林建岳，已經約見梁振英「挑機」。中央唔係叫唐、梁營大團結咩，仲乜嘢岳少唔聽話？查實岳少呢次係為旅遊業而戰，覺得限奶令窒礙旅遊業，促梁振英適時撤銷，否則點樣同人sell香港係購物天堂？
提出限帶兩罐奶粉出境後，梁振英明顯受惠，民望持續回升，但內地同胞卻感情受創，鬧爆香港，旅遊業界亦唔多like，擔心旅客無法盡情「濕平」。岳少噚日表明唔認同現行安排，指𠵱家唔係奶粉供應不足，而係市民喺某啲區嘅零售層面買唔到某隻奶粉，冇理由帶兩罐以上就拉人坐監兼充公咁嚴重，覺得要求撕走或整爛個罐嘅招紙，證明唔到嗰罐係香港入口奶粉，水貨客帶到返去都轉售唔到，自然唔再走粉。
佢話限奶令令佢推廣香港都難咗，「你話香港係購物天堂，但又唔畀買奶粉、唔畀買豉油、唔畀買呢樣嗰樣，我都唔知點答」，建議梁振英檢討，確保港B有奶粉飲嘅情況下就要取消。
反對取消一簽多行
至於一簽多行，佢都唔贊成𠵱家取消，因為一年有成三千幾萬內地客來港，只有千幾萬係一簽多行，當中有幾多水貨客唔知，但取消咗就好難叫內地再放寬番。佢話全世界都爭緊內地客，仲用毓民個仔為例，話幾年前聽毓民講，佢喺美國讀書個仔喺當地Prada做，由於識台語、普通話國語同英文，成為營業額最好嘅top sales，要管兩間店，可見遊客生意幾重要。至於唐、梁營係咪已經和解？岳少話商界利益先行，利益一致就冇乜營物營啦。
mailto:[email protected]