近日全城傳媒追查青衣綠悠雅苑3座38F樓王買家，事關呢個樓王單位位處單邊，兼享海景，定價仲高達515.2萬元，實用呎價7,402元，唔打七折計，市值呎價超過一萬蚊，仲貴過區內龍頭盈翠半島。聽聞，呢個單位嘅買家係綠表家庭客，都話香港多公屋富戶啦！
線人報料，話綠悠樓王業主係一名綠表家庭客，綠表客唔使入息同資產審查，可想而知，香港真係有好多公屋富戶。房協公關部呢兩日就半句風聲都唔肯透露，仲話人哋簽咗臨約後，一個月內就可以係土地註冊處查到大名，等吓啦咁。
呢個單位喺本周一首個揀樓日中午前已經售出，至於同座E同F室海景單位亦即日售出大部份單位，以兩房同三房為主，所以話，香港有能力買樓嘅市民，即使喺淡市選購單位都要揀到最好。