真普選聯盟周日首場喺城大舉辦嘅論壇，俾包括好多「愛港之聲」成員在內、以「保衞中環」行動牌頭出擊嘅人士踩場叫囂，無奈腰斬。但搞亂檔之後，愛港之聲竟然仲好意思，話會邀請真普聯召集人鄭宇碩出席佢哋喺28日舉行嘅佔中與特首選舉論壇喎。
愛港之聲主席高達斌向八方「呼冤」，聲稱當日去真普聯踩場者，好多都唔係愛港之聲成員嚟喎；好似佢咁吖，當日去到城大，都一直喺canteen留守冇入會場，想同嗰班叫囂者劃清界線咁款。佢仲話當日論壇建制同泛民都會請，確保和平理性進行，但叫囂受害者鄭宇碩已經當面請高達斌食大檸檬，話當日未必得閒。