亞視繼《亞視百人》之後，再搞《亞姐百人》，最近四圍去搵番啲N年前嘅亞姐出嚟亮相接受訪問，噚日就請咗同譚玉瑛一樣有不老症，當年喺亞視亦係做兒童節目主持出晒名嘅潔儀姐姐袁潔儀，另一個就係跳舞出身又搞學校嘅孫譽文（前名孫名翠），兩位亞姐都keep得好後生。
潔儀姐姐三年前嫁咗去廣州做煮飯婆，佢笑住話：「我老公耕田，做有機耕種，都唔易做，上面啲人唔識，最緊要平。」潔儀姐姐長住廣州，對於內地爆發H7N9禽流感，佢話唔理得咁多，只係做埋老公個阿媽，日哦夜哦叫佢記得經常洗手。
孫譽文珠寶強人
至於孫譽文則享受做個女強人，7年前讀完珠寶鑑證，即刻做埋珠寶設計，開拓佢嘅珠寶生意，噚日佢仲帶住自己設計嘅過百萬鑽飾：「個品牌都幾出名，每次首飾都係我設計，都要過百萬，係獨一無二，我喺北京都做過展覽，𠵱家會開拓中東市場，所以都好國際化。」
撰文：馮仁昭
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/