碼頭罷工連日都有各階層人士撐場，噚日輪到奇女子林依麗出場，佢帶咗20打新鮮出爐嘅蛋撻到場，慰勞成班工友，難得有熱撻食，唔使日日捱杯麵，工友個個搶住食。林依麗話佢唔屬於任何政黨團體，係代表香港人撐場，仲同工友傾咗兩句。
噚日仲有班神州青年服務社嘅義工，自費煲咗青紅蘿蔔粟米靚湯畀班工友，四大煲湯夠派足200碗，義工話煲咗成晚咯，因為見班工人罷工冇乜嘢湯水飲，專程帶湯水去碼頭畀佢哋補一補。林依麗見班工友一邊食撻一邊飲湯，就話資助班義工；請班工友飲多日靚湯。一班浸信會教徒噚晚都有探班，有工友高興咁話「耶穌都嚟撐我哋呀！」