鐵娘子病逝，唔少政界中人紛紛回憶與鐵娘子的那些年；其中一則流傳嘅軼事，竟然同特首梁振英有關。有人向八方爆料，指鐵娘子97年訪港時，據聞曾經要求一個中間人，介紹個「地下黨員」同佢會面；而最終嚟見佢嘅，竟然係當時嘅中方紅人梁振英。據講鐵娘子對梁振英嘅評語僅一個字：Cold。
戴卓爾夫人喺97年已經卸任首相多時，當年訪港，據知情人士話，因為佢一直好關心香港情況，所以想了解吓最新狀況，而戴卓爾夫人當年嚟到香港，一如所料約見咗一啲民主派人士。
不過，最爆嘅係，佢同時請一個老友，介紹個地下「中共黨員」佢識，據講，獲邀同鐵娘子會面嘅就係梁振英。
知情人士冇透露，會面究竟講咗啲乜嘢，只係引述鐵娘子事後對呢位「特別嘉賓」嘅評價，一字記之曰：Cold。家陣鐵娘子過咗身，八方無從考究除咗形容梁振英冷漠之外，仲有乜嘢微言大義，不過相信唔少接觸過梁振英嘅人，都有類似感覺。
特首辦例牌冇回應
梁振英當年上位做《基本法》諮詢委員會秘書長，好多人視佢係中共地下黨員，雖然佢已經N次否認，不過呢個身份始終搣唔甩。八方噚日詢問特首辦，梁振英當年有冇見過戴卓爾夫人？不過梁振英貫徹Cold本色，只透過發言人話，唔評論他人嘅引述，莫非因為，真的假不了？
mailto:[email protected]