45度角望落有啲似方中信嘅自由黨鍾國斌Felix,一心將香港深水埗打造成韓國東大門,噚日正式介紹佢牽頭成立嘅服裝發展委員會,連成日幫明星設計晚裝或婚紗嘅名設計師何國鉦,都係成員之一。
Felix話呢次號召咁多人參加,唔算好難,因為業界一致認同香港好有潛力發展時裝業,所以大家都願意花時間入委員會,幫手諗吓點樣發大嚟搞,推動香港成為國際時裝中心。
佢今個月拉隊去東大門偷師,睇吓人哋點樣發展出一個文化時裝產業,之後就會打政府主意,若然有啲嘢要政府幫手,佢一定會要求梁班子幫拖。梁班子唔會因為佢屬唐營而袖手旁觀啩。