名廚周中噚日去咗東莞「試菜」，應邀到當地享用三泰環保漁業出品嘅翡翠皇。三泰環保係喺東莞開設、首間環保科技結合生態養殖水產企業，標榜安全、新鮮及零污染，仲得到廠商會檢定中心頒發「刺身級」認證漁產品，即係做魚生都冇問題。
而周中噚日享用嘅翡翠皇菜式，自然唔少得刺身。原來今次係周中第一次食內地養魚整嘅刺身咋，笑指以前「邊敢食」。食完有乜嘢feel？佢話食落好似日本鱲魚，夠晒爽口，仲話翡翠皇喺香港叫寶石魚，元朗都有人養。三泰環保漁業行政總裁吳耀華透露，翡翠皇本星期開始喺某超市有售，價錢同香港養嘅同品種有機魚相若。