【記者黃慕群報道】小腿活生生被絞肉機絞碎，是甚麼感覺？「絞緊嗰陣又唔覺得痛。」59歲的張俊鵬若無其事地說，「絞咗四個圈」，一條小腿就沒了。他2月在其肉食店內換光管時，誤踏絞肉機而被絞碎小腿，目前仍留醫，稍後安裝義肢，「為咗換光管，搞到冇咗隻腳，我相信香港地冇人試過」。
記者到醫院探望張俊鵬，他坐在輪椅上，左邊膝下褲管空洞洞的。他說話爽快又開朗，毫不忌諱地憶述意外情景，太太在身邊不時作補充。他是九龍城金豪食品公司老闆之一，主要製造魚蛋及魚餃。
2月1日意外當天，張俊鵬清晨開舖，看見天花板的光管壞了，於是更換，「我唔小心差咗隻左腳入部機，諗住平衡個人，點知唔小心拍到牆上嘅開關掣，估計隻腳就咁俾把刀絞咗四個圈」。
十數日心情始平復
看着腳被絞了四個圈？「當時我唔敢望部機」，那只是他的專業評估。但他仍然非常冷靜，「即刻（一手㩒牆一手㩒機邊）拉番起個人，熄咗個掣，之後跌落地下……流好多血！隻小腿得番啲肉絲、血絲……」好恐怖！但他說時不帶半點驚慌，「我個人係好冷靜㗎！」
「絞緊嗰陣又唔覺得痛。但係當我跌落地下先開始覺得好痛！」有多痛？「好痛！好痛！好痛！好痛！好痛！」
他倒地不久，其拍檔剛好回到店舖，立刻報警。「送去醫院嗰陣，我開始覺得有啲暈」。當時他大量失血，抵達醫院後，做了五小時手術。醒來無法接受現實。
「頭嗰十幾日，我好唔開心，試過為件事喊」。對他來說，流淚可能是件大事。「好彩有班好朋友同家人支持我，日日嚟探我、開解我，話我執番條命已經萬幸」。當日若他未能及時拉起自己、或拍檔遲上班，可能早已「拜拜」了，「十幾日後我心情就平復喇！」
本月裝上臨時義肢
張太說：「收到電話話佢出事時，我好驚，唔知點算！個腦一片空白。」事後，她風雨不改地去醫院探望。原在澳洲進修的長子也立即回港，兩個兒子經常探望他，「好乖！」張俊鵬面帶笑容地說。他預計今個月會裝上臨時義肢，半年後可使用永久義肢。
肇事絞肉機現已加保護蓋，張的拍檔陳先生說，事後絞肉機最少洗了四、五次，「窿窿隙隙洗得好小心」，洗的時候「好核突」，「入面有好多碎骨、碎肉、腳趾仔……仲有好多血，洗咗好耐先乾淨」。