浸大呢期忙於同政府拗手瓜，矢志奪得九龍塘李惠利地皮建中醫藥教學醫院，浸大當然明白要贏人先要贏自己，嚟緊要加強中醫藥實力，而經常幫襯浸大中醫診所嘅退休企業家張安德明顯係「有心人」，佢最近捐出近60件珍品拍賣，承諾將拍賣到約600萬嘅收益全數捐贈浸大推動中醫藥，珍品中以一幅由數以萬計頭髮繡出嘅《髮繡清明上河圖》手卷最架勢。
負責本周五拍賣會嘅拍賣總監黃兆基同八方講，呢幅以北宋張擇端版《清明上河圖》為藍本嘅手卷，十幾年前由蘇州嘅工藝師，以數以萬計嘅大人、細路、長者嘅黑、銀、白、金、褐、棕色頭髮繡成，相信喺市場上獨一無二，製作時間長達兩年半，估價約為200至300萬，大會至今已收到唔少有興趣嘅買家查詢。另一項珍品就係畫虎專家馮大中嘅《夢鄉》，拍價約50至70萬。市民今日起一連兩日，可以到香港大會堂觀賞所有拍賣品。