喬老爺早排為幫阿爺做打手，求其引用一篇報章文章，就指公民黨主席余若薇一旦當選特首，將出現特首不知應否出席國慶活動呢種騎呢情況。
余大狀噚日接受港台訪問時，坦言聽到喬老爺咁講都唔知喊好定笑好，因為佢出任公民黨主席至今，出席過無數次國慶活動，仲要成日晨咁早叫醒明明放假嘅老公，叫佢做「柴可夫司機」，連累咗另一半，唔明喬老爺何出此言？
講到對中國文化嘅認識，余大狀話自己書法見得人，多得公民黨帶挈，因為年宵好難搵人由朝到晚幫手寫揮春，惟有自己捱義氣。
余大狀透露近來較愛用書法寫歌詞，話準備寫甄妮首《奮鬥》為參與佔中嘅朋友打氣。