郭富城、張家輝及內地女星江一燕，前晚和導演彭順到尖沙嘴出席新戲《同謀》首映禮，城城和家輝又再互送高帽，家輝大讚城城比之前更型仔，城城聞言亦讚對方說：「你今日都好容光煥發。」
該片稍後在內地上映，但近日上海、浙江等地爆發H7N9禽流感，城城會否擔心疫情？他坦言擔心，不過既然大家認真工作，自己會照去。但家輝聞言即說：「我唔去㗎，喺香港有嘢做，你（城城）都唔好去，做嘢都唔好㗎，我暫時都唔去大陸，惟有由城城撐住先。」城城笑言：「我夠義氣，你要請我食飯。」
城城透露不會拒返內地，昨日他便到內地為賽車試車，問到有否擔心疫情影響票房？城城表示：「咁又未必去到咁恐慌嘅情況，非典之後政府都做得好，唔擔心，我都有影響力，會叫fans同觀眾做好防禦措施先睇戲。」
城城自爆有細路
家輝被問到是否因囡囡才不敢返內地？他表示並非單為囡囡，大家應關注健康。城城風騷笑說：「我屋企都有小朋友，不過係家姐嘅。」家輝取笑城城說：「你隱瞞咁耐，家姐食咗死貓，小朋友攞身份證未？」城城笑指：「家姐連老人證都攞埋。」
採訪：魯萍
攝影：陳慧安
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/