無綫新劇《巾幗梟雄之諜血長天》噚日喺將軍澳電視城舉行開鏡拜神儀式，主角胡杏兒、黎耀祥、蕭正楠同馬賽等出席，其中祥仔個中間分界髮型最搶鏡，連杏兒都忍唔住笑佢心理變態。
講番個角色，中間分界嘅祥仔一人分飾兩兄弟，其中大佬係變態嘅，因為細個流落日本時遭雞姦，搞到性無能，心裏充滿仇恨要報復，係都要人家破人亡，估唔到無綫近年幾乎逢劇必有強姦戲，連男演員都走唔甩！祥仔話呢套劇應該會如常喺6月去佛山拍外景，佢話唔怕H7N9禽流感喺內地越爆越勁，但會小心啲唔食雞：「最怕拍拍吓有雀屎飛落嚟啫！」而歐陽震華、關詠荷同黃智雯等《情逆三世緣》演員亦無懼禽流感，噚日上咗佛山拍外景。
杏兒死撐唔賣弄
至於飾演卧底嘅紅唇杏兒為套取情報，經常犧牲色相，同好多人發生關係，仲要俾日軍強姦：「呢啲出賣肉體嘅劇情通通都有內容，唔係為咗賣弄！」咦？咁咪係電視版嘅《色，戒》？杏兒話：「我有睇過，唔似！」講番之前街頭咀女斷正，杏兒話佢只係同中學同學goodbye kiss，仲話唔會「中途轉基」。
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/