九巴就快80歲大壽，話說喺1933年嘅4月13日，政府正式批咗個巴士專營權畀九巴，所以到今個星期六，就係九巴80歲生日。九巴會搞一連串活動慶祝，籌備緊下半年搞一個大型歷史展覽，市民可以免費入場緬懷過去。
出復刻車飛八達通
為咗搞展覽，九巴正公開籌集舊文物，其中搵番唔少連九巴自己都冇嘅舊嘢，例如有前九巴司機保留住一套五、六十年代九巴司機嘅制服。巴士司機制服本身已經有唔少古仔可以講，粵語片時代紅星張瑛1958年就拍過一套電影叫《第七號司機》，片中張瑛飾演巴士司機，就係着住呢一款制服。又有前九巴司機家屬同九巴講，當年離職嘅時候冇交返套制服畀九巴，因為套制服用料好正，夠晒保暖，所以將制服寄咗番鄉下接濟親友。
九巴亦會推出一套80周年紀念品，當中包括1949年九巴首架雙層巴士「烏嘴狗」模型，同埋一張復刻舊巴士車飛嘅八達通卡（圖），車飛面值1毫，上面有啲巴士站已經成為歷史，例如原來有個巴士站叫「紀念碑」站，究竟喺邊？據聞喺尖沙嘴一帶，對歷史有興趣嘅人不妨去追查吓。
剛剛加價冇耐嘅九巴又話，其實都諗過免費任搭巴士同市民一齊慶祝，但為免引起大混亂，阻礙正常交通，所以最後決定唔搞喎！九巴慶祝80周年活動詳情，可參考九巴網頁： http://www.kmb.hk
歷史中的九巴
mailto:[email protected]