隨住美國國際集團（AIG）舊年底沽埋最後一批友邦保險（1299）股份，母子關係正式結束，為擺脫美資形象，據聞，友邦旗下公司將於5月1號改名，保險公司嘅中文名會刪除“美國”二字，就咁叫做友邦保險國際，英文名只保留縮寫AIA，後加International，完全去美國化。
釐清定位 專注亞洲
本港有好多人幫襯友邦買保險，佢哋好快會收到信，話公司下月改名，其實要細心睇先睇得出個分別。友邦保險𠵱家個英文名係American International Assurance，為撇除美國味，將來只會用縮寫AIA，冇得直譯成美國國際保險。專做強積金嘅美國友邦退休金管理及信託，同埋另一間美國友邦信託亦會刪除美國字眼。
其實自友邦2010年10月來港上市，友邦一直喺度去美國化，當時AIG持股唔夠50%，由阿媽變成主要股東，友邦之後繼續係AIG提款機，先後為AIG籌集逾2,700億元。友邦總裁杜嘉祺亦經常劃清界線，指AIG唔係友邦阿媽，友邦係一間集中發展亞洲業務嘅公司云云。所以𠵱家改名，剔走美國味都係意料中事，對於客戶嚟講，最緊要保單條款冇變；股東就希望繼續有息落袋。
李華華
mailto:[email protected]