本來印尼球會佩斯寶，今晚8點就會喺旺角大球場同晨曦踢亞協盃F組第4輪賽事，不過佩軍噚日就甩底。賽事場監平井徹就話收到印尼足總通知，佩斯寶大軍會延至今日清晨5點45分先抵埗。呢隊波又傳財困，又傳造假，最後嚟唔嚟到執筆時都唔知；而一早幫客軍訂咗酒店同自助餐嘅晨曦，就食得唔好嘥，噚晚拉大隊去沙田麗豪酒店食每位價值398蚊嘅自助餐，實行食住等開波。
印尼足球向來騎呢，不時有傳當地大莊操控東南亞賽事賽果，所以假波傳聞不絕。港甲包尾嘅晨曦上星期作客佩斯寶，最後打成3:3各取分組賽第1分，但賽後有唔少傳聞，包括傳佩斯寶做假，搞到教練助查；後來又傳佢哋嚴重莫財，連機票都買唔起，可能甩底唔嚟香港。
傳佩斯寶今清晨到埗
佩斯寶原定噚日清晨殺到，但足總通知話佢哋冇如期現身，而我求大俠噚晚專程走去旺角場睇晨曦練波，兼了解佩斯寶大軍會唔會突然現身，出席賽前記者會同操練，結果客隊職球員都冇亮相。
亞洲足協派嚟做呢場波監場嘅平井徹就話：「早前同佩斯寶失去聯絡，但印尼足總電郵通知，話佩斯寶延期來港，要明（今）晨5點45分到埗；雖然佢哋冇按規定喺賽前一日到埗，如果今日開波前90分鐘仲未交到出場名單，會判佢哋輸0:3，而個人希望場波可以如期舉行。」佩斯寶喺分組賽頭兩場共失10球，當中主場吞馬爾代夫嘅拉迪恩7蛋，確實肉酸。
亞洲球會唔係隊隊都咁有錢，而亞洲足協為鼓勵參賽，踢亞協盃嘅球會每場作客賽事會有2萬美元（約15萬港元）幫補，雖然未夠機票同食宿，但好過早幾屆得5,000美元津貼。據好熟印尼足球人士話，呢隊佩斯寶財政向來有問題，球員好多得短約，喺亞協盃第一場波作客緬甸，已經要向友會撲水先可成行。而亞洲足協資助未到冇錢買機票，唔出奇喎！
今晚入場前check清楚
至於晨曦職球員見對手未到，噚晚響旺角場嘅最後操練個個笑騎騎，練完後仲去酒店食餐勁嘅，球員梗開心；而教練之一招重文就話，希望開到波，當友賽用嚟練兵護級都好嘛。球迷如想今晚8點入場捧晨曦，記得賽前上足總網頁，又或者打個電話上足總，問吓場波踢唔踢得成先出發。
網民反應
左倫右李
「一隊冇錢坐飛機，一隊冇錢播波，夠晒難兄難弟！」
ncyaa
「超級爛尾球隊，已經唔可以用晨曦同佢比，亂七八糟嘅程度直逼屯門普高。」
luiwai5
「XX（即晨曦）話估唔到仲有球隊hea搞過我哋！」
資料來源︰《球迷大聯盟》