朋友於愚人節當日收到示愛短訊，男方一心諗住趁愚人節借題發揮，有乜差池都可以用一句「愚人節快樂」打圓場。不過揀呢日示愛的確「愚」，因為唔理女方有冇心，都會當你玩佢。
借題發揮呢一招，運用得宜當然可以引人注意，好似秋官咁，趁「丁蟹效應」又應驗，就叫股民買飛睇佢部新戲搵啟示，大體得來做埋宣傳；相反，借到題但亂發揮，加分不成反扣分。
凱基證券噚日發報告推介幾隻H7N9受惠股，本來冇問題，但竟然發表偉論話因為H7N9未證實人傳人，同埋相信呢隻病毒都怕熱，到夏季就會銷聲匿迹，結論係H7N9唔會大爆發。
首先，隻病毒係新嘅，即使袁國勇都只係話隻「有機會」夏天後失蹤，分析員何德何能落呢個判斷？再者，到底係唔係真係冇人傳人，內地確實感染人數又有幾多，邊個知？𠵱家最大風險因素係內地隱瞞疫情，而唔係病毒本身。所以分析員要就算焗借題發揮交功課，唔該認真少少啦。
Fifi
本欄逢周二、四刊出