回想10年前爆發SARS,每日睇住確診人數不斷增加;10年後內地爆發新型禽流感H7N9,暫時未證實會唔會人傳人,但確診人數升至20人以上卻是事實。
高盛力撐東航及南航
人心惶惶之際,股市往往是最現實的地方,只要發生天災人禍,就會出現賺錢機會。雖然禽流感對經濟增長影響有限,但短期確實有損投資氣氛,保險、航空、消費及零售股等成為輸家。
不過,高盛列出兩大原因力撐航空股:(一)經過SARS後,投資者承受風險能力已增加,即係唔會再咁容易沽貨;(二)2003年航空業大受打擊,但亞洲航空股PB竟然仲高過2001年「911」事件時,所以有理由相信市場已做好準備,隨時趁低撈貨,航空板塊中,該行繼續首選東方航空(670)及南方航空(1055)。
數據顯示,SARS期間,亞太區航空業載客量大約5個月時間就回復SARS前高位,就算國泰航空(293)、東航及南航股價曾大插三至四成,大約4至6個月就收復全部失地。摩通指出,經過SARS一役後,亞太區國家已更識得應付禽流感,除非疫情急速擴散,否則航空公司載客量及股價不一定會重複當年慘痛的一幕。
不過,疫情始終非數據所能預測,昨日航空股的確輕微反彈,想撈底就要做足坐艇心理準備!
瑪姬兒