碼頭先天性就很容易成為壟斷行業。首先因為地理限制，每個地區適合起碼頭的港口唔會有好多，加上行業高度capital intensive，投資每每幾十億元起跳，又要和政府有良好關係，所以進入呢一行的門檻極高。雖然前期投資異常龐大，但只要碼頭一建好、營運成熟後，這生意根本就是極度賺錢。難聽啲講，就好似惡霸買下咗一條經貿主要通路，向路過的生意人收取高昂嘅買路錢一樣。
咁惡霸有乜經營成本呢？主要係人工和一般燈油火蠟，但相比起佢的收費水平，簡直就濕濕碎。全球幾個主要碼頭營運商，用來量度他們日常經營效益的指標——EBITDA率，全部高逾40%。即係唔計機器折舊，收你100蚊處理費賺你40蚊！世上唔係好多行業有呢種盈利水平。
和黃（013）喺分拆本港HIT及深圳鹽田港上市前，是全球最賺錢的碼頭營運商，EBITDA每年達20億美元。如果單計香港HIT盈利能力，EBITDA率達50%。分析員估計，如果HIT肯承擔500個罷工工人的加薪一成幅度，一年都係要畀多1,360萬元而已。乜叫賺盡？有數你睇。
海迪