都話《忠烈楊家將》有料到，成套戲都係戰爭場面，鄭少秋飾演嘅楊令公加埋七個仔，逐一喺戰場上拜拜，最後淨得吳尊飾演嘅楊六郎執番條命返到屋企，咁鬼慘烈，加埋今次好靈嘅秋官效應，套戲仲要喺清明節上畫，港股想唔跌得慘烈都唔得啦，恒指上周五咁就跌咗610點。
難得秋官仲識講笑，佢肯定無股票喺手。此話何解？華華上周五透過WhatsApp搵秋官做訪問，想佢講吓做明燈嘅心得。秋官翌日回覆，話唔喺香港，叫股民睇新戲就知箇中玄機；再問佢咁慘情都有玄機？佢就唔答。
一班輸緊錢嘅股民仲喺度療傷，諗起秋官，唔爆粗已經偷笑，會唔會咁笨，真係入場睇套戲有乜玄機呢吓？如果個市一路跌，股民只會希望套戲有咁快得咁快落畫。