夜期今晚開波，唔少交易員要由日更轉夜更，唔計蘭桂坊，以前入黑後變得水靜鵝飛嘅中環，或者有個新面貌。中環機利文新街有唔少做中環人生意嘅食肆，其中24小時營業嘅新源興燒臘負責人黃太話，唔少證券從業員做到半夜先收工，舖頭喺消夜時段都係做交易員生意多。
雖然黃太話，估計唔到夜期推出後，對生意嘅影響有幾大分別，但夜期開波後，肯定有更多交易員要午夜放工，放工後食碗麵鬆一鬆都好正常。
喺中環有間24小時營業分店嘅翠華（1314），之前都話會用外賣服務吸客，睇來可能有更多中環食肆開足24小時或者做到凌晨時份都未定。