合和（054）太子爺胡文新鍾意打冰上曲棍球，早年創立香港冰球訓練學校，搵外籍教練來港開班不在話下，最近佢仲私人拎一億元出嚟成立一個冰球基金，旨在推廣香港冰球發展，真係好愛冰球喎。
胡文新說話陰聲細氣，彬彬有禮，年過40，樣貌依然一臉孩子氣，好難將佢同硬橋硬馬嘅冰上曲棍球拉上關係，偏偏佢經常落場打波，在港推廣冰球運動少說都有十年八年。
曾用過百萬買溜冰場
佢早年已經創立香港冰球訓練學校，前年曾經拎過百萬元買入一個可拆式仿真溜冰場，透過訓練學校名義，借畀本地學校用來訓練學生打波。因此，聽見佢私人拎錢出來成立基金都唔覺出奇，不過拎一億元就真係幾闊佬。
聽聞呢個基金啱啱成立，名都未有，具體點用仲有待落實細節，應該包括用來搞學校聯賽、起冰球場、請多啲教練來港呀咁，證明胡文新都唔係淨係掛住搞合和二期。