股份一隻隻倒下，血流成河，上周五市況慘過《忠烈楊家將》。日股開香檳，港股發雞瘟，已成事實，北韓挑釁、H7N9、資金撤走，抑或秋官效應、一蚊雞、光銀上市，原因任君選擇。你說跌得太突然，但車公下籤、3月落雹、沙士十年，似乎無形之手一早已有啟示。
講咁多其實都係想說明，原因都是事後加上去的，跌市殺埋身，硬要搞清楚才做決定已慢了七拍，沽低幾十格。有懷疑，不要問，只要沽，拉勻有斬獲的話，不妨買飛捧秋官場，支持港產片，同時獎勵自己的果斷決定。
魏力留意緊兩隻股：鬆馳熊大熱，帶挈代理商德林國際（1126）去年勁賺1.3億銀，增長73%，現價6倍PE，7厘息，中線有潛力翻半番。另一隻係同仁堂科技（1666），旗下數百種中成藥產品，除牛黃解毒片及安宮牛黃丸外，仲有板藍根顆粒，對H7N9有冇效就唔知，但近日多個城市搶購一空，齋呢個概念已經夠殺。
魏力
本欄逢周一、二、四、五刊出
http://www.facebook.com/2012jason