港股上周五怒插610點，22000關一攻即破，Sell in May疑似提早展開。心水清嘅戰友不難發現，今年港股開局同舊年極其相似，頭一兩個月炒到㷫烚烚，尤以中資股為甚，但去到第二季壞消息就開始浮面，舊年呢個時候，大家開始驚阿爺經濟會硬着陸，其後希臘更爆出脫歐疑雲，恒指反覆跌到去6月初先見底。
𠵱家內地禽流感疫情持續蔓延，加上區內地緣政治緊張，再配合中美有機會收水，港股短期肯定易跌難升。戰友如想搵好淡分水嶺，不妨以恒指50日線作指標，舊年9月初歐美齊齊放水，刺激恒指重越此線，結果去到今年2月初始再度失守。現時50日線約處22900，同現貨有1,200點差距，淡友明顯佔上風。
市場吹淡風，可揀強勢股作低吸目標，傢俬股敏華控股（1999）去年銷售收入達6.1億美元，按年增長14%，美國市場收入比例升至53.6%，美股屢創新高，敏華有望繼續受惠，睇中線可候回試6.30元樓下吸納，相對穩陣。
唐牛