近年好多大孖沙唔願意以基礎投資者身份入股新股，主要唔想被股份禁售期綁死，股價升得靚亦無得沽，有得睇無得食。姚明應該好明白呢種心情，佢早年投資深圳A股合眾思壯，股份禁售期本月初解禁，可惜呢隻股嘅股價已經從高位跌近八成，唔見咁多先賣得，飲恨。
合眾思壯主要研發同生產衞星導航定位產品，打開籃球嘅姚明走去投資呢類公司都幾令人費解，不過唔好理，最緊要有錢賺。佢07年以37.5萬元（人民幣．下同）入股，公司2010年上市，姚明揸住105.3萬股，按上周三收市價，市值1,766萬元，睇落已經賺到笑，但呢隻股上市初期，收市曾見69.314元，之後股價持續下滑，姚明賬面唔見超過5,500萬元呀。
姚明投資都幾多元化，除咗呢隻股，仲有投資喺私募基金同埋中國籃球聯賽寶（CBA）上海大鯊魚，不如遲啲好似李寧咁，整番間姚明乜乜公司來港上市吖。