759阿信屋創辦人林偉駿上星期同八方講支持碼頭工人罷工，又閒談吓港人嘅零食口味。林偉駿透露，阿信屋最好賣原來係芝士拉麵，八方即刻上網睇，原來唔使廿蚊就有一袋四個麵。八方嘅同事都大讚好食，但就話呢個係相當邪惡兼係味精食物，所以都係少食為妙。
林偉駿又話，一般人都好鍾意食薯片，香港人都唔例外，但香港人原來唔多鍾意食醬油味嘅薯片，所以即使日本嘅醬油薯片種類繁多，阿信屋都唔敢大舉入貨。
佢又話，原來唔少公公、婆婆有時都會買包裝精美嘅日本薯片畀孫仔孫女，等佢帶番學校同啲同學仔慢慢嗒，效果同帶土炮薯片係兩回事。