李八方噚日拜讀「梁粉」報章報道，話梁振英上任後，外訪開支同Cheap曾有天壤之別，事實上真係有「天壤之別」㗎！據特首辦向立法會提交嘅文件顯示，狼英無論喺香港、北京、珠三角，使錢都狼死過Cheap曾，單係喺香港嘅酬酢開支，平均每月高過Cheap曾三成；走轉珠三角外訪，狼英每日開支高出人哋一倍，講到大花筒，估唔到隻狼仲勁過Cheap曾。
每月使足約3萬6
入主禮賓府之後，狼英由去年7月至今年2月，短短8個月酬酢費開支高達近30萬蚊，平均每月使足約3萬6，比Cheap曾最後一年平均每月使2萬7，高出三成。香港通脹都冇飆三成咁多，狼英因乜嘢要比Cheap曾使多三成呢？唔通招呼內地權貴、同西環頻密食飯搞成咁？真係要等啲議員幫手問吓咯！
即使離開香港，狼英使錢一樣狼死。兩位特首每年年底去北京同阿爺述職，使錢一樣都係倒水咁倒。Cheap曾最後一次述職，平均每日使1.5萬，狼英平均每日使1.6萬，多人哋近一成。狼英親吻大陸，出錢又出力，唔怪得阿爺咁鍾意呢位黨員啦，覺得佢可以振興強國經濟吖嘛。
兩任特首一樣返過大陸出席珠三角論壇，Cheap曾09年最後一次出席，去咗三日，每日平均使唔夠5,000蚊，咁狼英呢？佢一去就去足四日，每日平均使近1萬蚊。睇完盤數，八方真係覺得全港納稅人好慘，每年辛辛苦苦交稅，結果啲錢就係咁樣俾兩位特首亂咁使。
李八方
mailto:[email protected]