有冇聽過大地產商高層會反對起樓？最近浸會大學爭取將前李惠利校舍用地做中醫教學醫院，反對將呢塊地起豪宅。
八方收到風，唔少浸大重量級校友，好似一啲傳媒高層都有發功幫母校做說客。估唔到最新形勢係，浸大搵到「神」級校友、有「樓神」之稱嘅長實執行董事趙國雄幫拖。
樓神呢次真係好出力，噚日就喺街站「企街」，呼籲市民一人一信向城規會提出反對，唔好將呢塊地用嚟起樓。嘩！地產霸權中人反對發展地產？都真係好少有喎！唔通佢作為首富嘅悍將，所以唔怕出面反CY？八方重聽聞，趙校友係自動請纓支持浸大，認為呢幅地真係唔應該用嚟起樓咁話。