從技術分析去睇，恒指嘅中線強弱指標9周RSI已經跌到去35.9，晉佳睇番近20年嘅港股牛市調整，低極都係跌到去9周RSI 35左右就止跌，假設目前係牛市嘅話，港股理應距離底部不遠；不過，如果港股已經重返熊市嘅話，當然低處未算低，即使現價當起步應該仲有排跌。
反正已經去到決定是牛是熊嘅臨界點，現價買入再大跌就可以走貨，輸極有限，所以晉佳個人覺得，𠵱家係部署博反彈嘅時候。
再睇埋上星期五壞消息多籮籮，喺美股插、內地H7N9禽流感擴散憂慮同埋北韓出口術宣戰嘅情況下，恒指急跌超過600點。晉佳覺得，市場喺理由充份嘅時候大跌，應該足以喺短時間逼使所有驚恐嘅人掟貨，呢種跌市通常一兩大棍就完成，結論係唔使太驚。
等整固 中線睇15蚊
晉佳喺上星期五已經叫各位搵優質嘢去買，當日見報推介嘅復星醫藥（2196），能夠逆市升4%，算係好彩，但其實晉佳叫大家買呢隻股，並冇考慮乜嘢禽流感因素，所以可以繼續持有。
至於上星期五急跌嘅航空股，主要係因為禽流感拖累，加上要跟番航運股近期跌幅，藍籌國泰航空（293）唔覺唔覺跌番落去舊年5月低位附近，市賬率（PB）去番0.87倍，晉佳認為中長線應該唔係太差啫，穩健型投資者分段吸納亦無妨。
國泰舊年上半年蝕錢，下半年就每股賺番47.1仙，回復應有嘅正常水平，至於今年頭兩個月營運數據受到春節因素影響，按年比較數字欠可比性，至於市場暫時就估計3月數據唔會靚仔。不過，股價跌到低位，數據差已經反映喺股價之上，H7N9出現加速咗股價跌到低位，分分鐘形成中長線買入機會。
國泰上星期出現周線圖大陰燭，即使已經見底，起碼亦要需時兩周喺低位整固，然後先能夠回升，想跟進嘅投資者唔使急，大可以一邊觀察H7N9疫情發展，一邊等股價整固到咁上下先至吼位買，中線睇番15蚊。
晉佳
本欄逢周一、三及五刊出