政客經常派膠，令網界不時出現令人發笑嘅「萬能key」。咪以為淨係禮義廉先識得製造萬能key呀，原來自由黨都會帶畀我哋好多歡樂㗎！
網民金句中央啱聽
佢哋嘅青年團主席李梓敬噚日喺《城巿論壇》講碼頭工潮，爆出為免被操縱，「工人想搞工運時，唔好俾工會介入」嘅金句，咁有邏輯嘅發言，網民點會唔回應呀？
李梓敬激發網民創意，金句如雲，文人鄧小樺話：「想食蘋果批時，唔好俾蘋果介入」；民主黨區諾軒就認為：「馬迷想賭馬時，唔好俾馬會介入」。有網民就話：「一國兩制唔好俾一國介入」、「睇東張西望時，唔好俾良心介入」、「想玩遙控車時，唔好俾遙控介入」。
有為食怪就覺得：「煮出前一丁嘅時候，唔好俾個煲介入」；中央最啱聽嗰句，應該係：「選特首時，唔好俾市民介入」。睇完自由黨嘅表現，八方就覺得，「市民想爭取自由時，記住唔好俾自由黨介入」囉！