「夜，天花板有着妳……」在梳化上小睡片刻，張開眼見天花板之外，睇睇個鐘，兩點鬆啲，未開波住，本住慣性收視嘅定律，睇睇1號台有乜睇先，嘩，唔睇猶自可，一睇唔得掂，深夜音樂節目播哥哥啲舊歌，唔係翻唱嗰啲呀。嘩，咁點算呀，本來等睇巴塞對PSG㗎喎，呢個時候唔好同我講錄影機，呢個時候講嘅係忠貞，畀你，你點揀？
我？我梗係揀哥哥啦，美斯呢啲好嘢，個個禮拜有得睇啦，「為你鍾情，傾我至誠，請你珍藏這份情……」一嚟就整首充斥住哥哥大頭嘅主打，雖然話係眼都唔眨啫，但係隻手指都慣性響部手機上面掃掃吓，咦乜facebook咁多另一位朋友嘅大頭呢？原來碧咸今日終於有正選，唔係唔過去望一望啩，尤其是當我見到個MV入面梅姐着晒婚紗客串女主角，轉一轉台喇，想當年梅姐都係碧咸粉絲嚟嘛，唔怪你嘅。
睇咗開波一陣，隊PSG似乎明知主場唔攞啲甜頭先，下一round實冇運行，頭段個勢好勁，拿維斯咁搏嘅？想話畀人知球場上仲有另一個阿根廷射手啩！界外球，快速轉台法，「她的嘴巴低呼好嗎，跳嗎……」正，柏安妮呀，sorry，主角當然仲係哥哥，但熱辣辣入面嘅柏安妮當年令到唔少男仔頭流晒鼻血，等我試吓佢家陣仲有冇咁嘅威力先，唔……可能天氣唔夠燥熱，我冇事喎。
又轉番去巴黎，乜美斯個膝頭哥咁快損晒呀，反而佢見紅喎，但係你唔好理，丹尼爾腳指尾拉過頭，美斯仔殺入，球不着地，窩利抽射，執波，領先就唔使睇住嘞。「夢娜麗莎只是一幅畫，PSG都係唔夠打……」又係梅姐加哥哥，記得02年兩位last合唱呢首《芳華絕代》，兩個都聲沙冇氣但搏盡表現，家陣睇一次眼淚流一次。
「怎去開始解釋這段情……」Leslie加Alan呢首世紀合唱，話畀大家知咩叫亦敵亦友，正所謂唔怕強勁對手，只怕豬般隊友……講遠咗㖭，聽完之後一轉台，伊巴呢位前巴塞朋友笑住追平，果然係好對手。哥哥播完，場波先至下半場，但美斯傷出咗，所以之後嗰45分鐘，我望住天花板多過螢光幕，就係瞓唔着。
keyman
now TV主持
mailto:[email protected]