歐聯8強首回賽過，西甲3支雄師中，皇馬可謂篤定晉級，加拉塔沙雷雖擁有地獄場館，但在巴拿比奴慘吞3蛋，回天乏術矣。至於巴塞，則可謂唔贏唔抵，球證作「梗」，回魯營固然有地利，亦兼有兩個作客入球在手，但畢竟於比分無甜頭，而陣中傷兵纍纍；聖日耳門既有晉級機會，定必傾全力作客求勝，則巴塞縱可憑技高晉級，但難免有再添傷兵之憂，或隊員積黃牌導致4強賽缺陣之虞！苟有差池，真箇多得佢唔少。
各位看官若有觀看比賽，則可目睹執法之德國裁判一錯再錯，始令巴黎聖日耳門能首度扳平；錯誤之一，乃是巴塞於被攻之際，兩員隊員頭撼頭受傷倒地，球證視若無睹；錯誤之二，則更是不依球例，堅持於聖日耳門強攻不果後，命巴塞兩球員治傷後，必須站於場外枯候，令巴塞再陷9打11之險象良久，方允之重回賽場；錯誤之三，則是誤判越位之伊巴謙莫域執死雞有效！錯誤三重奏流水行雲，嘆為觀止！
若說第一錯乃是認為巴塞隆拿球員詐傷，則是罔顧禁區內人馬雜沓之兇險，兼且不察球員頭部受傷，必須吹停球賽，以作延治！球例亦確認，任何一隊有兩名球員受傷倒地，應鳴笛暫停；一錯之後，再犯另錯，則既然先前不理巴塞球員倒地，而讓對方受惠，則又何須令巴塞球員到場外枯等，再次優惠聖日耳門，更且為時甚久？若非如此，則「紫紅兵」人手足夠，或已大腳解圍；則毋須於混戰中，讓「伊巴」越位偷雞！
一口氣「連中三元」，這德國佬若非球證而是前鋒，簡直無敵殺手！
長毛
mailto:[email protected]