【第32屆香港電影金像獎頒獎禮之導演篇】夢想從來難實現，「紅褲仔」出身的鄭保瑞入行初期曾為電影與一向愛錫自己的母親冷戰；又試過窮得戶口只餘個位數字存款，在最低潮時期終獲母親體諒並給予支持，發憤要做齣好戲！入行20年的鄭保瑞今年終憑電影《車手》首次競逐香港電影金像獎最佳導演，他坦言多年來幸好有母親及老婆對他無限體諒及支持，才可堅持下去，他以新世代來形容今年的最佳導演角逐者，更笑言今次自己落場：「有得鍊」！
撰文：文國駿
與鄭保瑞做訪問不多不少帶點私心，當年他所拍的《恐怖熱線之大頭怪嬰》及《熱血青年》給筆者留下深刻印象，其中後者更被外間形容為千禧年後最恐怖的港產片之一；到今次拍《車手》，雖然他完全不懂玩車，但不論票房及效果皆比預期中好，他坦言要多得錢嘉樂與海棠等特技車手搵命博，才能拍出一部如此真實的飛車電影。
感激杜琪峯
鄭保瑞表示拍攝時沒有想到電影可行到那麼遠，更差點拍了一部劣品出來，他說：「拍呢部電影時乜壓力都冇，因為票房、拎獎都完全冇諗過，因為唔係好夠資源，開頭同監製杜琪峯都諗收到七百萬都收貨。我仲記得當時我要到內地拍另一套戲，咁就粗剪咗一個版本出嚟睇吓先，點知睇完覺得差到不得了，即刻打返公司問杜琪峯睇咗未，有冇說話講低，好彩佢仲肯畀機會我重拍某幾個場面，好多謝佢咁信任我，如果係第二個監製，可能已經求其上咗，部電影就冇㗎喇。」
早前鄭保瑞分別於導演會及電影評論學會中獲得最佳電影及最佳導演等獎項，是否令他對角逐本月13日舉行的金像獎信心更大？他說：「的確係信心大咗，其實今年係特別嘅一年，因為角逐最佳導演嘅全部都係我哋呢一代嘅，咁啱咁多位前輩喺呢個時候冇電影上，造就咗呢個局面，我覺得有得鍊㗎！」
鄭保瑞的電影多貫徹其「人性本惡」信念，但五年前囡囡出世卻改變了他，至少把他投放於電影中的稜角稍稍磨平，他說：「睇到一個生命誕生係好奇妙，雖然我依然係信人性本惡，但𠵱家我會喺電影入面加啲光，好似余文樂喺《車手》入面冇晒鬥志諗住衝落海，但最後諗番起黃秋生講嘅說話，結果最後一刻扭軚，救番自己一命。」
談到入行經過，鄭保瑞表示自己19歲才真正喜歡電影，並應徵了製作助理終日流連片場，但他亦如多數電影人一樣，經歷過朝不保夕的日子，他笑言：「我成日都話我哋拍嘢係兼職，正職係搵嘢做同埋失業。我試過戶口得番唔夠十蚊，係好冇安全感，但呢個都係一個動力嚟嘅，因為鋪鋪清，每一部電影都要拍得最好，我其實幾享受呢種壓力。」
對不起母親
鄭保瑞續表示入電影圈是一條頗孤單的路，剛入行時跟母親試過兩年沒說話，他說：「入行頭兩年時因為工作唔多，又冇錢出去玩，有半年都留喺屋企，基本上我媽咪一返屋企見到我冇嘢做就會有火。不過有一日佢乜都冇講，只係入房拎咗張五百蚊畀我，我嗰時只係感動到識同佢講對唔住，眼淚係咁流，佢就話唔緊要，叫我揀好條路就要畀心機行。呢件事冇令我有放棄念頭，我反而應承自己一定要咬緊牙關行落去。」
場地提供：The AIR（The ONE）
第32屆香港電影金像獎 最佳導演入圍名單
鄭保瑞
《車手》
彭浩翔
《春嬌與志明》
羅志良
《消失的子彈》
陸劍青、梁樂民
《寒戰》
林超賢
《逆戰》
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/