都市傳聞,鄭保瑞拍電影時最善於折磨演員,例如拍《狗咬狗》逼李燦森藏身垃圾堆,搞到有曱甴飛入他口中;又試過於《軍雞》逼余文樂跟真正K-1拳手打真軍,令樂仔一度被打暈;而他對女演員亦不會憐香惜玉,拍《怪物》逼到林嘉欣及舒淇精神瀕臨崩潰邊緣……筆者在訪問中向鄭保瑞求證,他尷尬地笑起上來,並沒有否認,他說:「其實拍我嘅戲係辛苦嘅,首先我電影入面嘅角色好多都係好極端,其次係因為𠵱家科技好厲害,你做過拍過嘅每一格菲林都係留底,同埋大家都唔知會唔會有下一部,我成日都話呢部可能會係遺作,一定要出晒力咁拍到最好最真,不過我每次都𠱁到啲演員去做嘅!哈哈!」
鄭保瑞續表示試過跟演員在片場鬧交,他說:「嗰陣逼余文樂同個真拳手對打,仲要打足幾個鐘咁拍,搞到佢爆晒粗問我係咪黐X線,我話我係黐X線㗎,快X啲打!因為我覺得係真打就真打,鏡頭之下係完全睇得出,冇得呃人。喺《車手》入面都係,我都會係咁push佢哋有幾盡要去幾盡,可以話係搵命博,而大家都知係為部戲好,所以拍完後都會冇嘢。」
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/