【銅鑼灣→渣甸山】現年31歲嘅無綫上位花旦胡定欣近排雖然忙拍新劇《食為奴》，但佢都冇冷落筍盤男友沈栢淳（Patt），男友係廣告公司老闆，胡定欣當然mark到實，有報道踢爆佢哋已喺渣甸山同居，早前仲傳佢哋打算出年結婚，胡定欣例牌否認。
前日下晝5點幾，胡定欣就孖住男友Patt拍拖逛銅鑼灣時代廣場嘅city'super，佢哋狂掃火鍋材料，估計佢哋準備打邊爐，胡定欣揀咗好多凍肉、金菇同蔬菜，好多時又同身邊嘅Patt交流意見，有商有量，好似小夫妻咁。
突變師奶仔
Patt喺買嘢期間，佢見好多顧客就先去排隊，等女友揀完就滙合畀錢，不過佢哋未畀錢又改變主意去揀酒，結果買完嘢佢哋就去攞車，胡定欣仲做男友柴可夫，佢哋上咗車再去咗灣仔街巿，泊低車就由胡定欣獨自去菜檔買菜，又買啲肉丸，平日出鏡嘅花旦突然變咗師奶仔。雖然兩個人撐枱腳，但佢哋都好識食，買咗好多嘢，當胡定欣上返車，下一站去埋買貓糧先返渣甸山愛巢玩煮飯仔，實行二人世界烚烚吓。
採訪、攝影：楊浩賢、朱志聰、徐錦池
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/