海王集團（070）短短兩個月跌咗40%，得番一倍幾PE，濠江賭業類中，平到不得了。海王主打濠江博彩中介人業務，截至去年底嘅2013年半年度，純利增長26.5%到1.76億銀，已經有靚仔業績打底。而今年1到3月，澳門總體博彩毛收入分別增加7.3%、11.5%及25.4%，總額高達853億銀。濠江賭業繼續好景，海王繼續肥仔水。
係咁意計數，就當海王2013年下半年純利，同上半年睇齊，全年純利3.5億銀，增長24%，連埋今年1月配股嘅攤薄效應全面反映，預期PE都係得1.7倍，吸引到爆，真係仲想點？數係咁計，海王現價翻一番到0.27元，2013年度預測PE，都係得4倍單位數，呢個水位，仍然平得離晒大譜。
第一上海博一蚊
第一上海（227）話咁快由1月中1蚊水位，直插番到挨近五年低位「長城鋼價」0.50元橫行區。同好多其他股仔一樣，第一上海經呢輪插水，日線圖RSI插到20樓下超賣區，而現價嘅NAV高達67%，吸引到痹。又第一上海亦係cycle pattern幾明顯嘅股份，股價跌到呢啲位收集，唔錯得去邊，中線博上番1蚊，回報翻半番。
錢雋