近日內地確診多宗H7N9禽流感個案，人心惶惶，杜汶澤大無畏精神，日前如常去上海錄影一個慈善遊戲節目，點知真係「出事」！不過慶幸唔關禽流感嘅事，而係佢經理人霍汶希（Mani）噚日下午突然喺微博透露阿澤錄影時跌傷咗，嚴重到要中止錄影，嚇到阿澤老婆田蕊妮急到要透過微博搵老公。
取消錄影提早返港
及後馮仁昭聯絡到Mani，佢話阿澤玩平衡木時太心急，搞到整傷左腳小腿上五寸下五寸嘅位置，在場人士見佢跪咗喺地好耐，仲有啲紅色疑似血迹滲出，嚇到Mani差啲暈低，Mani話：「後來發現係油漆，好彩冇斷骨，𠵱家搽住藥油頂硬上繼續工作，但隻腳腫晒，決定取消聽日錄影，提早返港。」唔少圈中好友好似舒淇、江若琳、邵音音等喺微博留言關心，導演彭浩翔仲千叮萬囑叫阿澤唔好睇當地醫生，佢話：「我提議，錄影完後，即回酒店，勿赴醫院。」可能係擔心H7N9疫情。
阿澤噚晚六點幾喺facebook報平安，話叫咗醫生去酒店作進一步檢查，應該只係肌肉受傷，仲識講笑話﹕「唔好問我隻腳痛唔痛，你去問下條木痛唔痛！」
撰文：馮仁昭
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/