季尾密密戰，軍情亂咁嚟，隔夜刨波，有時好易中伏。今周本欄重心分3天出擊，最信曼聯唔會玩嘢，下周一曼市打吡必精銳盡出殺曼城，重奪曼市1哥之名兼早日登基，必取少讓平/半上盤。
上周賽前，問過本組頭號槌仔幫粉絲安迪，又叫同事鍀仔check過fantasy league傷停報告，以為韋斯咸隊長路蘭真係唔出得先寫稿；結果呢位大隊長神奇傷癒復出，佢老友安祖卡路爾變番銀槍頭入兩粒，掃走西布朗，令本欄未能三炮齊響；沒有怪誰，只怪自己眼拙。有耐性波友，不如信出場陣容，好似周一場英足盃，見曼聯排弱陣；聰明錢即傾注向車仔讓平/半，上盤客個個完場笑逐顏開。
今次唔使估費Sir排乜嘢陣，連英足盃都唔愛，下個禮拜一場打吡，必定復用唞夠嘅朗尼、尹佩斯同尼曼查維迪等主力，喺奧脫福全攻死敵曼城，誓要報回上季主場1:6嘅敗辱。前鋒出身嘅費Sir賽前被問到冇乜錦囊畀近期啞火嘅尹佩斯，佢老人家暗喻對方射波唔好成日擺晒姿勢熨角攞滿分，低潮中不如好似爵爺老竇教落怒bang埋對方龍門攞番啲信心，射失都無人怪責。信曼聯連首席射手都收到order唔好再玩嘢，也覺曼城部份超高薪戰將對文帥越加不滿，衞冕幾定失敗嘅藍月亮呢場波輸埋，文帥烏紗季後幾定不保；你係嗰班藍軍大佬輩，會唔會喺今場送波士一程，下季洗牌再來？
今晚4場戲碼反而麻麻，賭波從來唔怕掉轉槍頭，俾人左一巴右一巴；次選，今晚反西布朗撐一次阿仙奴，客W有1.85倍尚有分頭，贏番拜仁攞個彩小兵壓力大減踢得好咗；西布朗季尾風流波玩嘢唔會守得密，啱晒一周一賽嘅阿仙奴唞夠作客打高速反擊，車仔熱刺話事人「玩嘢」仍沉醉歐霸盃，阿仙奴爭4哥佔上風。
冷選想試下愛華頓禮拜日打低熱刺，愛華頓近3季同同市宿敵利記喺第6至8位纏鬥，屬戰意所在，唔看重最後有冇歐洲波踢；今季走勢同出一轍，雖然聯賽3連捷喺主場，但作客對疲兵兼連星級球星加里夫巴利都攰到拗柴嘅主隊，波帥太冒進了。拖肥糖對賽從來唔輸蝕畀熱刺，今場馬會初盤開主隊讓半/一後縮回平/半，讓唔起咯。（下次見報日期：13/04）
蘋果波神