誰說舊一定不好，韋家輝和杜琪峯的新作《毒戰》集多部前作的大成，令一部合拍片變得不一樣，流露港片韻味，也呈現兩人創作力最旺盛時的澎湃動力，既有《神探》和《非常突然》的意想不到，又有《鎗火》的官能刺激。又要多得前重慶市委書記薄熙來的「打黑除惡」構想，令《毒》片導演杜琪峯和編劇韋家輝興起拍內地販毒案件電影的念頭，片末更將內地對毒販判毒針的死刑呈現眼前。
撰文：藍文浩
內地講述黃、賭、毒的電影向來要「政治正確」，韋家輝跟杜琪峯的新作《毒戰》就以較寫實手法為合拍片重新定位。《毒》片導演杜琪峯和編劇韋家輝日前表示資料搜集上的準備足可拍成兩部電影，編劇韋家輝說：「連續幾日同幾十個公安見面，隨便傾又有，官式拜訪都有。」杜琪峯則笑說：「可能我對公安印象一般麻麻哋，但見過面後，發覺佢哋心入面都知道佢哋嘅天職。」
修正內地演員演技
故事由內地從南到北拍攝，希望透過古天樂的奸險令故事更峯迴路轉，前年平安夜在天津開拍，杜琪峯說：「去天津本來想拍雪景，點知冇，最重要係想拍出內地咁大，由南方去到北方嘅地域性，公安追毒犯由一個省去下一個省嘅味道。」即使如此，拍攝並不變得容易，韋家輝補充道：「天津係海港，走私可以好方便，但亦係好凍嘅地方，每朝8點先開始有陽光，但下晝四點鐘就開始天黑喇，所以拍攝用多好多時間。」
有了背景資料又有場景，但選角也讓導演頭痕，杜琪峯說：「內地演員演戲太細緻，變到好似『撚戲』咁，我哋習慣自然啲，但經小修正後就冇問題。我哋冇參考過內地公安片或劇集，但同成日扮公安嘅孫紅雷合作得真係好好，佢哋習慣收晒劇本先，佢又出名鍾意自己加嘢，但我哋唔係咁，去到現場冇得改，開頭佢都想加㗎，後來就好快習慣咗，同佢合作真係幾好玩。」
雖然有孫紅雷做緝毒公安，但古天樂飾演被捕後仍不斷想甩身的香港毒販發揮似乎更大，韋家輝說：「一見到孫紅雷就覺得同一啲之前見過面嘅公安起到化學作用；至於古仔就因為自己落咗網，所以想將其他人拖落水，喺我印象入面，通常毒犯一定都好聰明，所以佢一直要畀孫紅雷感覺佢仲有一張底牌，咁佢就可以唔使死。」
《神探》七鬼再現
編、導兩人合作拍《毒戰》，但到尾竟發現欠缺了兩人舊電影的味道，少了特色，故此韋家輝臨尾加插幾部舊作的情節，令人一看就知是兩人的作品，韋家輝說：「拍到尾好似唔見咗啲嘢咁，所以加番啲囉。」杜琪峯接着說：「我哋覺得要有自己特色，所以有七個人出現，感覺好似《神探》裏面七隻鬼，咁最後一場始終都係要打一鑊勁嘅，呢啲槍戰戲內地電影好少，又好有《鎗火》味道，又有《非常突然》意想不到嘅結局影子，可以話係集大成。以前呢啲鏡頭內地唔會批，今次批咗我哋就要盡量發揮。」
雖然內地出盡力支援，又公安又舊檔案，但始終與現實社會存在一定差距，杜琪峯笑說：「以前都係內地人做賊，香港人做兵，𠵱家調番轉頭，其實都可以話係諷刺緊我哋自己。」劇情最後當然邪不能勝正，多少要點政治正確，編劇的韋家輝說：「要送審就要咁，道德觀一定要整死佢（古天樂），但故事本來係毒犯古仔走甩咗，隔幾年後一班警察先至捉到佢。」杜琪峯接着說：「繩之於法其實有幾多？根本就拉唔到咁多，但道德上要咁寫，內地好難批呢個題材，又因為要送審所以故事就咁。」
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/