講廣播劇很易洩露年齡秘密，揭開這一版，假如你呀一聲叫出來再遙想青葱歲月，你應該有三十。
九十年代前中期，商台主導過一系列精緻浪漫的偶像廣播劇，最紅男角配最紅女角，輪流對戲談情，宣傳品靚過今天的唱片封套。
那是個連廣播劇主題曲都唱到街知巷聞的年代，趕返屋企追劇，不叫宅，叫時尚。
記者：劉嘉蕙
攝影：劉永發、黃子偉
M：鄧潔明，雷霆881執行監製
D：Donald，叱咤903助理總監、DJ
G：German，叱咤903執行監製
A：蘋果日報
都回不去了
說起來是二十年前的事，那是梁朝偉還會唱歌出碟上《勁歌》的年代，年輕人晚上都扭去903，追聽他跟當紅玉女楊采妮合演的廣播劇《初戀無限次》。那時German晚晚躲在錄音室做混音、鄧潔明為趕着出街的《戀愛1/2》及《我心不死》度劇本、剛加入電台的Donald自稱在German身邊打雜釘稿。
A：這系列偶像廣播劇對當年青少年來說很震撼。演的都是天王天后，包裝靚，又出書搞演唱會。
M：這件事當年是很創新的。過往的廣播劇都是電台演員做，到九十年代，電台定位有變，剛好那時樂壇星光熠熠，有四大天王，唱片賣得好，唱片公司肯畀錢宣傳。那系列廣播劇的配套很強，會做歌、搞演唱會、出書。兩個主角，主題曲一人要有一隻，睇吓用幾多時間！𠵱家出一張咁嘅唱片都唔得啦！
D：當時我負責釘裝，電腦好似啱啱發明（笑），稿仲係手寫。錄劇時好多效果都要同步進行，車聲人聲音樂聲幾時出入，要計到好準，冇得跳錄，錄一集要一日。𠵱家一部電腦搞掂晒。
G：混音都好原始，用一餅帶，搵鉸剪剪貼。
M：有件事我好記得，以前要聲效，會找外國碟， 但《我心不死》 需要個聲效叫「打邊爐」，嗰次German真係自己整個火鍋，錄條聲返嚟。
G：冇聲感覺唔到件事嘛！我心態是，佢哋artist表演咁好，我都唔想做得差，咪出一分力。
M：當時藝人都唔同，一答應錄劇，要畀成晚，最記得錄《戀愛1/2》，阿王（郭富城）錄到半夜，彭羚走先，阿王自發開OT，錄多段獨白先肯走。
G：佢哋要求好高，錄完聽返，會主動話想錄個好啲嘅版本。
M：我覺得那時藝人冇咁計較，覺得好玩就做。每個劇都投入好多，當時一個劇三十幾集，要對戲，不會單收 （各自錄自己部份再後期拼貼）。錄完個劇好夜，唔會黑面、唔會催，會喺冷巷影相留念、寫啲深情說話，好依依不捨咁。𠵱家，藝人忙，多數單收，錄完個劇不用碰一次面。
D：以前錄完個劇，大家會好friend，𠵱家唔會。
A：值得花咁多資源錄一個劇？
D：係熱血囉。
M：那個年代係好熱血好浪漫。每套劇大結局會做drama，短短半個鐘，藝人會嚟對戲走位，仲要唱歌，我諗𠵱家唔使旨意。
G：我最欣賞劉德華，同佢錄過《我心不死》同《全職殺手》，佢好有heart，令個劇加好多分。
M：劉德華超聰明，錄一個打乞嚏，會研究自己打乞嚏嘅聲；要做心跳聲，就自己用喉核去整，睇佢劇本，全部做晒筆記，埋位好少NG。
A：系列反應好好，點解會完？
M：都係班底有人走，可能移民，可能轉工。
G：其實後來都有張學友做《獨臂少年》、《全職殺手》有劉德華同謝霆鋒，不過冇全盛期咁密，變成年度大劇，
D：艾粒都試過搵明星做廣播劇，但後來覺得約明星好煩，索性自己錄。𠵱家偶爾都有明星廣播劇，但係唔同晒囉。
電台制度唔同晒
A：本身是廣播劇迷嗎？
M：唔係。其實我鍾意舞台劇。但我好早接觸廣播劇，記得剛入商台，叫我寫個劇仔，用林子祥的歌去寫，負責錄的是鍾保羅，係八十年代嚟喎！
D：我係喎！細個成日聽一台的《怪談》，《怪談》係一個人講晒，其實廣播劇最好玩就係幻想。我記得大師兄陳輝虹有個劇，好癲，佢係寫好稿，on air搵人做，冇得NG，一NG就笑，笑都係內容一部份，好好玩，但要佢哋呢個功力先得。
A：原來咁多嘢玩，𠵱家唔好話有明星，廣播劇都所餘無幾。
M：做廣播劇是很奢侈的事，要好長時間錄，又要混音，未計創作，製作半小時劇，要24小時，人力物力好襟計。另外是電台制度也不同了，𠵱家廣播質素推高晒，節目強調要有資訊性，好多內容之前會錄好晒。假如要做一個劇，就要完成以上一大堆工作，返到屋企先可以寫劇本，變相人人都要勁開OT先做到。
D：𠵱家基本上得返我同阿占有不停做劇。好痛苦㗎其實，我好慢，一個劇20分鐘，我起碼寫五個鐘，星期一至五差唔多日日寫，唔寫會瞓唔着。另外一點係，以前電台差不多所有人都有條件錄劇，𠵱家唔得。
我哋唔寫冇人寫
A：你可以唔使咁辛苦喎，20分鐘時間，播五隻歌就打發咗。
D：唔得，係自己把尺。寫劇唔係計有冇人聽，係計自己有個崗位，你唔寫就冇人寫。𠵱家二台得返我同阿占寫，將來如果冇喺度做，就冇人寫喇！
A：新DJ會寫？
M：一個現實是，𠵱家唔係咁多人鍾意寫嘢。我哋一代，廣播劇可能是情意結，聽到會好開心。𠵱家啲人未經歷過，覺得點解要咁辛苦做一個劇呢？
A：好聽唔好聽分別喺邊呢？
D、M：嘩，好難答，German答。
G：錄嗰時會知有冇感覺……嗯，有啲有心寫，但效果未必好，可能創作始終要浸囉，要枕住寫，要練習，一年半載先捉到。
D：我就係，讀一次，要自己笑到，先得。自己覺得ok，先抬得起個頭。
A：你同阿占會互相批評嗎？
D：冇，𠵱家已經聽唔到真話（眾大笑）。做咁耐，做得好唔好自己知，但係唔做，就全世界都知。
A：有冇一個moment覺得，廣播劇好似冇乜人聽，不如唔好做。
D：嗯，有冇人聽唔知，但係𠵱家想聽廣播劇，只可以喺呢度搵到，一定要咁諗。
German晒冷私人珍藏
一人一個廣播劇心水
Donald《鴿子園》（2001）
一來全個二台一起做，角色就返每個台前幕後的性格放入去，有意思。另外佢係古裝劇，但係講緊現代，好有寓意。
鄧潔明《我心不死》（1995）
係我自己嘅創作實驗，一個劇有偵探、懸疑、愛情元素，聽返feedback好多人真係驚，對我係好難忘。
German《全職殺手》（1998）
本身我想揀《我心不死》，自己做後期時，真係聽到打冷顫。畀多個我會揀《全職殺手》，劉德華做得實在太好。
