熱火前鋒保殊搞一轉生日派對，就唔見咗370萬！佢唔係狂開貴價紅酒香檳，又唔係請幾千人開P，竟然係因為佢兩公婆去P，俾劫匪大破空城計，結果損失48萬美元（約370萬港元）珠寶，好彩賊人都有良心，冇偷走佢辛辛苦苦喺熱火拎嘅冠軍指環。
中東主題肚皮舞孃助興
保殊原本喺3月24日29歲生日，不過就延至周三先喺邁阿密海灘Bamboo夜總會開生日P，佢老哥就定咗個摩洛哥主題，仲安排埋肚皮舞孃同真駱駝助慶，一眾熱火隊友好似勒邦占士、獲迪等，都化晒妝着晒民族服裝出席，保殊同老婆Adrienne仲好威風，搭直昇機到場㖭。
不過保殊半夜盡興返歸，就由天堂跌落地獄；話說佢哋返屋企，點知發覺前門同後門都冇上鎖，已經心知不妙，立即搜查個珠寶櫃，發現總值48萬美元嘅名錶、戒指、首飾都唔見咗，結果就立即報警；好彩留喺屋企嘅一對仔女都冇事。
疑為內鬼盜370萬珠寶
保殊貴為頂級NBA巨星，2010年以1,230萬美元購入嘅大屋唔單止豪，保安系統都係頂級，現場又冇強行闖入嘅痕迹；當其時保殊屋企除咗一對仔女，一名冇透露姓名嘅年輕人，仲有兩個保姆；警方就覺得事件應該有內鬼串通，睇嚟兩位保姆嘅嫌疑就最大。
唔知班賊有良心，定係覺得冠軍指環太揚難脫手，保殊幫熱火上年拎到、價值過萬美金嘅冠軍指環就冇唔見到；保殊事後話：「我哋梗係唔開心㗎啦，不過從好個方面睇，我哋全家都冇受傷，都算不幸之中大幸。」保殊隊友都好同情佢，前鋒凱斯林講：「真係不幸，保殊係好人，又為本市拎總冠軍，點解賊人都要落手。」今季先加盟熱火嘅阿倫就好擔心邁市安全：「我有啲擔心，我要好好改善對家人嘅保安。」