07年6月14日，谷祖琳頭上的一片藍天染成灰白。弟弟祖堯，因為思覺失調病發，在祖母自殺的同一個地點─九龍塘喇沙書院跳下輕生，離世時僅20歲。一個小天使的離開，喚醒了家人對此病的關注，花了兩年走出喪親陰霾的谷祖琳，現致力推動社會關注思覺失調症，希望弟弟之不幸不要降臨到他人身上；谷媽媽則將所有工錢，用在內地起學校，紀念愛書本但再沒機會升學的祖堯。撰文：魯萍
一個癒合的傷口，仍會留下傷疤，小谷明白到要推廣思覺失調這個病，幫助飽受折磨的病者，難免觸及痛處，她說：「放低未？未！每一日，每一分每一秒都諗起佢，以前嘅遺憾感覺，𠵱家變成懷念，以前係唔可以掂到個傷口，獨處時眼淚冇停過咁流，我同細佬感情好好，佢好乖好畀心機讀書，對我打擊好大，不停問點解，一個咁好嘅人會有咁嘅下場…持續咗兩年，有一日突然間喺我前面出現咗個畫面，如果我再行前多一步，就會跌落深淵，父母家人都會好傷心，我要撐住照顧佢哋嘅情緒。」收拾心情後，她決志深入了解此症有關的一切，就和阿叔谷德昭、姑姐谷薇麗幫手推動「香港思覺失調學會」。
及早對症下藥
當時小谷對此病一知半解，弟弟病發時花了太多心力去求神問卜，縱然也有求醫，但沒及時對症下藥，病發至輕生僅短暫兩個月，遺憾嗎？她說：「嗰時大家都好驚，唔認識呢個病，病者痛苦我哋唔了解，以為青春期反叛，又以為係撞邪，雖然有睇醫生，但又走去睇其他嘢，個病有起伏期，要及早對症下藥。思覺失調患者會有幻覺幻聽，唔了解嘅人以為係撞邪或者黐線，簡單咁講，就好似血壓高病人，要食藥keep住血壓水平，思覺失調可以醫得好，好多發病嘅都係年輕期，父母多啲認識呢個病，對患者好重要。」
由不知道怎樣令自己快樂起來，到走出傷痛，除了親友之外，她慶幸身邊有丈夫劉穎恆，上天又賜了她女兒劉心，另一個小天使的降臨，令父母得以再展歡顏，小谷笑說：「爸爸抱住個孫就開心滿足，媽咪開舖打發時間有寄託，細佬鍾意讀書，媽咪覺得細佬冇機會再讀，而呢個世界亦有好多人冇書讀，所以就將賺到嘅錢，喺內地起谷祖堯紀念中學。」
教女分辨好壞
小谷本性樂天，遇到問題願意與人分享解決，祖母、弟弟輕生離開的悲慟，她終能走出陰霾，並說：「有問過醫生，曾經有憂慮過自己會唔會遺傳到呢個病，下一代又會唔會呢？最後發覺冇得擔心咁多，當初都冇諗過咁快生，同計劃有出入，突然有咗個小生命，就生囉！知道細佬讀書壓力好大，唔想畀下一代有讀書壓力，只會教佢分辨好同壞，經歷過咁大件事，覺得乜都係整定！」
場地：小甜谷
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/