市況動盪，正好測試股份的紮實程度，能逆市創新高，除反映莊家或基金的實力，也證明公司盈利能力出眾，股價才能屹立不倒。近日推介的舜宇光學（2382）及金山軟件（3888）先後破頂，睇往績PE似貴，但計及未來增長仍抵買，股價才會高處未算高。散戶唔敢追，芬佬圍晒飛，條街冇貨，自然升得又急又勁。
今日畀多隻中信電訊（1883）大家。隻股由去年底1.70元起步，沿50日線升到家陣3蚊，可謂穩如泰山。事緣集團今年初斥資90億銀，向英國大東電報及葡萄牙電訊收購澳門電訊79%股權，令持股量升至99%，刺激股價大爆發。澳電於澳門一向獨市經營，入行門檻高、行業風險低，業績穩步上揚，去年勁賺9.6億澳門元，名副其實是一隻「現金牛」。
中信電訊料有關收購本季完成，因屬「政治任務」，成事機會高。澳電未來料佔集團盈利70%，以此計算，未扣除融資成本，今年盈利將可達12.2億元，較去年勁升1.65倍，每股盈利將飆至51仙，意味現價預測PE僅5.9倍，勁抵買，加上其現金牛特性，防守性甚高。
中信電訊蓄勢突破三年高位，MACD重現雙牛，成交大增配合，破位應無懸念。以8倍PE為目標，可見4蚊！
魏力
http://www.facebook.com/2012jason
本欄逢周一、二、四、五刊出