市場上唔少人對港股睇得比較淡，散戶持貨量亦越減越縮，但恒指同個別股份已經調整得幾多，按照相反理論，人人睇淡我睇好，通常都有着數，所以𠵱家係吸納好股時機，但艱難市況之下，選股好壞對回報影響重大，絕不能忽略基本因素，求其撈啲熱門股博反彈。
事實上，晉佳都覺得近期選股做推介唔容易，一啲好嘢升到頭也不回，想搵個靚位入市都難，至於績差股就更加唔使諗，因為完全睇唔到佢個底部。
3月係放榜高峯期，挨近3月28日嘅業績公佈死線，放榜嘅業績通常相當難睇，惟獨3月27日朝早公佈業績嘅復星醫藥（2196），算係表現唔錯，值得留意。
中線目標價17.4元
復星醫藥業務分得幾散，藥品生產、分銷、醫療服務以至醫療器械都有做，其中以藥品生產業務比重較大，佔毛利近九成。根據招股書，公司生產嘅藥品有625種，未來有增無減。藥品種類多，好處係唔使倚賴其中一項藥品，風險比較低，當然盈利亦好難有一下子爆升嘅能力。
公司去年純利增長34%至15.64億元人民幣，增長模式同時倚賴內在增長同收購，原本嘅業務穩步上揚，至於收購就為盈利錦上添花，同做分銷嘅國藥控股（1099）有相近之處，後者市盈率24.5倍。
由於復星醫藥業務分散，盈利穩定性比一般藥品股高，但又未必及得上藥品分銷股，歷史市盈率16.8倍唔算貴，根據券商預測，今年市盈率大約14.3倍，計落有兩成增長，長遠升到去18倍並唔過份，即股價17.40元。
以圖論勢，復星醫藥去年10月30日上市，招股價11.80元，股價一直穩步上揚，業績靚仔帶動放榜日股價急升8%，最高見過14.46元，跟住連續兩日回吐，本周三股價先跌後回升，形成陽燭鎚頭，股價正處升勢途中，回都唔捨得回，相信現價唔會維持好耐，自然會發力再上，中線目標價就睇17.40元，跌穿13元止蝕。
晉佳
本欄逢周一、三及五刊出