旗下嘅葵涌貨櫃碼頭工潮越演越烈，但碼頭老闆李嘉誠一直拒絕開腔回應。八方同事日前再貼身追訪誠哥，問佢同唔同情被無理剝削嘅工人啦，點知誠哥俾個仔李澤鉅阻住回應之餘，李澤鉅仲背住記者拋下一句「冇××」。由於「××」兩個字唔多清楚，惹起全城猜猜澤鉅到底講乜嘢嘅風潮，結果大部份市民「裁定」，澤鉅係話「冇感覺」，唔係咁涼薄嘛？
誠哥相對好有禮貌
誠哥日前同家人去咗柴灣拜祭亡妻莊月明；八方同事一見到誠哥，就問工潮有冇影響貨櫃碼頭？誠哥好有禮貌咁話「早晨」。同事再追問可唔可以講幾句，誠哥仲點點頭，好以想話好咁㗎，但呢個時候澤鉅就擰頭，示意誠哥收口咁款。同事再追問：會唔會同情班工人呀？入咗𨋢背住記者嘅鉅鉅好含糊咁話「冇××」，然後閂𨋢走人。
八方同一班同事，聽極都聽唔清楚鉅鉅講啲乜嘢，決定交畀市民裁決，將條片放上《蘋果日報》網嘅即時新聞度公諸同好，估唔到惹起全城熱猜。
八方總結市民留言，發現最多市民聽到「冇感覺」，亦覺得呢個推論好合理，事關澤鉅肯定唔知工人苦況；有人仲話如果冇猜錯，澤鉅真係太涼薄，留言話：「看來班工人要給他一些感覺。」
除咗「冇感覺」，都有部份人聽到「冇講過」、「冇諗過」同「冇嘢講」等。與此同時，亦有人話聽到係「冇廣告」、「冇古講」同「冇銀喎」，似乎有少少天馬行空咁喎。
mailto:[email protected]