今輪英超嘅重頭戲，一定係下星期一曼聯迎戰曼城嘅榜首大戰兼曼巿打吡；而曼聯嘅塞爾維亞後衞尼曼查維迪，喺日前更為呢場大戰火上加油，話喺呢場比賽打完之前，都唔會同曼城嘅塞爾維亞好友高拉洛夫及拿斯達錫講嘢。
維迪唔睬高拉洛夫
尼曼查維迪話：「喺賽前我從來唔同對手傾偈，雖然我同高拉洛夫同埋拿斯達錫係好朋友，但我都係唔會同佢哋講嘢；因為我覺得喺賽前做啲咁嘅事係浪費精力，我只會集中精神，踢好比賽。」
又難怪維迪咁囂嘅，因為喺為紅魔披甲逾60場嘅球員當中，維迪係擁有最高勝率嘅紅魔兵，只要佢上陣，曼聯嘅勝率有成接近7成2。對此佢話：「喺下星期一，就可以睇吓呢項數據準唔準喇！」
傳耶耶5.3億續約4年
紅魔有維迪撥火，而藍月亮喺賽前亦傳嚟好消息，據報曼城中場主力耶耶托尼已同意同球會續約4年，新合約總值4,500萬鎊（約5.32億港元），除番開嚟計，即係22萬鎊周薪。29歲嘅耶耶喺2010年7月，由巴塞隆拿以2,400萬鎊過檔曼城之後，一直都係球隊主力，而曼城上屆可以後上奪得英超，佢居功至偉；難怪早前耶耶經理人放風話佢可能離隊，曼城就即刻做嘢，開張新合約過呢名科特迪瓦國腳啦！