保華建業（577）計劃變身濠賭股，前日召開股東特別大會，獲批准改名為「路易十三」。新主席洪永時（Stephen）開估，話改用呢個咁出位嘅名，同支過萬蚊嘅干邑無關，主要係想玩法國style。
酒店裝修 參考凡爾賽宮
洪永時一身打扮潮到不得了，撇開五顏六色頭髮唔講，白色西褲配花喱碌裇衫，都唔係人人着得到。被問到做乜改名，佢澄清同支酒無關，主要因為公司喺澳門路氹嘅酒店項目走法國style，裝修參考十七世紀法國國王路易十三下令修建嘅凡爾賽宮嚟做，所以咪改番個名叫路易十三囉。
淨得個名唔掂，佢間酒店將會同巴黎米芝蓮三星食店合作，加強法國style。Stephen又爆響口，話搵埋路易十三好多代之後嘅後人做特別顧問，遲啲會再有公佈，大家不妨拭目以待。